معرفش ليه بعد كل الوقت ده خدنى الحنين انى ابص على المدونة واشوفكم

جايز لانى هنا وهنا بس بكون نفسى مش اى حد تانى

وجايز لانى هنا بقول كل حاجة بصوت عالى

وجايز اكون جاية استخبى بجرحى فيكم

المهم انى لقيتنى بفتح الصفحة واقراها مرات ومرات

ولقيتكم وحشتونى او بمعنى ادق لقيتنى وحشتنى ومش انانية قد ماهو افتقاد لعفويتى

ولكلام يطلع من قلبى ليكم واحس برغم انه منشور لملايين الناس تشوفه الا ان الكلام ده اسرارى

ولانى عادة بقول كلام نكد

مش عايزة افاجئكم واقول كلام فرايحى

برضه نكد لاجديد!!!!!!

انا هو انا والدنيا ملطشة مووووووووووووت بس عادى بقى

جديدى انى حبيت فى قصة حب

وكعادتى فشلت

القصة المرة دى طويلة على كونها قصة لكن الظاهر ان الضربات اللى مش بتموتك

بتخلى الجرح غويط وصعب يلم تانى

انا لا اعتقد ان الضربة اللى مابتموتش بتقوى

والا كان زمانى احد الشخصيات الاسطورية

زى زينا كده وبسلامته هركليز

هارجع لكم تانى بتفاصيل القصة

المرة دى مش ناوية اغيب لانى اكتشفت انى بكون اسعد من غير قناع الابتسامة الزائف

اللى بقالى كتير مخبية وراه حاجات كتير وجعتنى

ولأنى لا اكف عن الأفتكاسات قررت اعمل منتدى

من كام يوم كده وانا بدور على الانترنت لقيت منتديات كتيييييييير

قولت فى عقلى طب ما اعمل لنفسى واحد

هم يعنى اللى عملوه قبلى احسن منى ولا اشطر منى ؟!!!

المهم طبعا انى بعد مجهودات عويصة جدا قدرت اعمله والحمد لله 

ومن هنا بدعوكم كلكم تيجوا تزوروا منتدايا وتقولولى رأيكم

وطبعا ياريت وشرف كبير لى انكم تكونوا اعضاء معايا فى المنتدى وبدل ما يبقى حلمى لوحدى يبقى حلمنا كلنا

وبوعدكم فى يوم من الايام انى بقدرة الله وتوفيقة اخليه احد أفضل المنتديات على شبكة الانترنت

انا سميته أحلام بنوته لأن احلامى مالهاش حدود ياللا شاركونى الحلم بأفكاركم وابداعتكم انا منتظراكم هناك

www.a7lam.banouta.net

صباح الفل عليكم

دى مش عزومة مراكبية ولا حاجة

اعتبروا التدوينة تدوينكم (زى كده البيت بيتكم)

ياللا بقى نبدأ رحلة التهيييس (اقصد التدوين)

سعيدة جدا كأنى اخترعت الفيمتو ذرة

بقى عندى مدونة

يالهول تلك الصاعقة.....